ماهو البراند ؟

ماهو البراند

  ماهو البراند ؟

الصراحة اول مالناس يسألوني ايثار انتي ايش تشتغلي اقلهم انا مصممة علامات تجارية أو brand designer
يعني اذا انت عندك فكرة مشروع انا رح اشتغلك على الاستراتيجية و الهوية البصرية والتسويق
طيب في ناس يفهمو ده بشكل عام وفيه ناس لما اقلهم التفاصيل يفهموني وفيه ناس لا  ،  و انا فكرت لازم الاقي شي ابسط من كده اشرحه للناس عشان يعرفو ايش يعني براند ؟

خلينا نفكر بالعلامة التجارية اللي دايما قدامنا و تعجبنا ، مثلا في شانيل، او في الأكل ماك، او في الشوزات اديداس هذه العلامات التجارية كيف صارت مشهورة وكيف صارت براند، وليش صارت براند وليش نحن نحبها؟

اذا عرفنا ايش يعني براند حنفهم ليش صارت براند او ليش هيا براند ؟

الآن فكر معايا في شخص  قريب منك او بعيد عنك او مشهور لما تشوفه مرة يعجبك ..،  و نفسك اي شي يجي منه تاخده و نفسك تشتري اشيائه أو نفسك تكون مثله او  نفسك يسويلك اي حاجة  و يخدمك فيها ،حتى مولازم يكون يبيع شي، المهم يكون  شخص تحبه.

طيب يلا الآن خلينا نفكر ونتذكر
كيف طريقة كلامه وطريقة لبسه ،و لما بدك تطلب منه حاجة كيف حيستقبل ده الطلب، و لما ييجي يسويلك شي كيف يجبلك هو مثلا : لو جيت طلب من دا الشخص ، وتبا منه يسويلك أكل هل هو راح يطبخه ويجيبه في القدر ( الحله ) لعندك وخلاص يلا كل ، ولا هو هيجيبلك هو في صحن وجنبه بيبسي وسلطه وحركات كأنه من مطعم ..

طيب فكر كمان كيف بيتعامل معاك او مع الناس واسلوبه معاهم ؟
وايش هيا اهم مبادئه بالحياة . يعني يتكلم عن المبادئ و يطبقها ولا بس كده ماشي يتكلم ومايطبقها .
طيب الاشياء اللي هو يسويها انت تحسه عنده مبدأ فيها حتى لو هو ماتكلم عن هذه المبادئ  و لاحظها .

اوصفه بثلاث كلمات يعني مثلا هو  فخم ذكي لبق زي كده ،  و فكر  هو كيف يساعد  الناس .
و لما يجي يقدم نفسه قدام الناس كيف يتكلم عن نفسه ..
طيب كل دي الحاجات واكتر اللي انت فكرت فيها وكده حطيتها قدام عيونك وركزت فيها وقلت و الله انا هيا دي اللي عاجبتني و الحلوة فيه حتى لو ماكانت  حلوة ، حتى ممكن يكون مو كل شي فيه بيرفكت بس انه كل دي الحاجات واشياء اكتر من كده تعبر وتوصف ايش يعني براند و وكل شخص هو براند مشهور ولا مو مشهور انسان عادي قريب منك ولا بعيد عنك ، وبعد كل هذا فكر لو كان هذا الشخص مشروع هل راح تتعامل معاه ؟

الآن كل الحاجات اللي انا قلتلك عليها نحنا لما نصمم علامة تجارية بنشتغل على كل هذه الأمور وأكثر ، فعشان كده حيكون في فرق بين ان الواحد يفكر يسوي مشروع عادي او مشروع يكون علامة تجارية الناس يتذكروها و يعرفوها ويتفاعلو معاها ويحبوها .
ان شاء الله تكون وصلت لكم فكرة  معنى البراند وقرروا من هذه  اللحظة كيف تبوا مشروعكم يكون .